စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ ပြည်ထောင်စုဝန်ကြီး ဒေါက်တာပွင့်ဆန်း ၂၀၂၂ ခုနှစ်၊ ပညာရည်ထူးချွန်သူ ကျောင်းသား/ ကျောင်းသူများနှင့် သင်တန်းထူးချွန်သူ ဝန်ထမ်းများအား ဂုဏ်ပြုဆု ချီးမြှင့်ခြင်း အခမ်းအနားသို့ တက်ရောက်အမှာစကားပြောကြား

       ၂၀၂၂ ခုနှစ်၊ ဇူလိုင်လ ၈ ရက်နေ့၊ (၀၉:၀၀) နာရီအချိန်တွင် စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ညီလာခံခန်းမ၌ ကျင်းပ ပြုလုပ်ခဲ့သည့် ၂၀၂၂ ခုနှစ်၊ ပညာရည်ထူးချွန်သူ ကျောင်းသား/ ကျောင်းသူများနှင့် သင်တန်းထူးချွန်သူ ဝန်ထမ်းများအား ဂုဏ်ပြုဆု ချီးမြှင့်ခြင်းအခမ်းအနားသို့ ပြည်ထောင်စုဝန်ကြီး ဒေါက်တာပွင့်ဆန်း တက်ရောက်အမှာစကား ပြောကြားခဲ့သည်။

     အခမ်းအနားတွင် ပြည်ထောင်စုဝန်ကြီးက အမှာစကားပြောကြားရာတွင် နိုင်ငံတော်အစိုးရအနေဖြင့် တစ်မျိုးသားလုံး ပညာရည် မြင့်မားရေးဟူသည့် ပညာရေးဆိုင်ရာ အမျိုးသားရေးမျှော်မှန်းချက်ကို ချမှတ်ပြီး ပညာရေးပြုပြင်ပြောင်းလဲမှုများကို ခေတ်စနစ်နှင့် လျော်ညီစွာ စီမံကိန်းများဖြင့် စနစ်တကျ အကောင်အထည်ဖော်ဆောင်ရွက်လျက်ရှိရာ နိုင်ငံသားတိုင်း အခြေခံပညာကို ကောင်းမွန်စွာ သင်ယူတတ်မြောက်ရေး၊ ကျောင်းသား/ကျောင်းသူ လူငယ်များ ဘက်စုံ ထူးချွန်ထက်မြက်ပြီး နိုင်ငံတကာအဆင့်မီ ပညာရည်မြင့်မား ရေးနှင့် အရည်အသွေးမြင့်မားသည့် လူ့စွမ်းအားအရင်းအမြစ်များ ပေါ်ထွန်းလာရေးဟူသည့်  တစ်မျိုးသားလုံး ပညာရည်မြင့်မားရေး မျှော်မှန်းချက်များ အောင်အောင်မြင်မြင် အကောင်အထည်ဖော် ဆောင်ရွက်နိုင်ရန် စနစ်တကျ စီမံဆောင်ရွက်လျှက်ရှိပါကြောင်း၊ နိုင်ငံတော်အစိုးရက မျိုးဆက်သစ်လူငယ်များကို ပညာရည်အဆင့်အတန်း၊ အရည်အသွေး၊ ကျွမ်းကျင်မှုနှင့် စွမ်းဆောင်ရည်များ ပြည့်စုံစေပြီး အမျိုးသားပညာရည် မြင့်မားစေရေး စီမံကိန်းများ အကောင်အထည်ဖော်ဆောင်ရွက်လျက်ရှိရာ မိမိတို့ဝန်ကြီးဌာန အနေဖြင့် လည်း တစ်တပ်တစ်အား ပါဝင်ချီးမြှင့်ပံ့ပိုးသည့်အနေဖြင့် တက္ကသိုလ်ဝင်တန်းစာမေးပွဲမှာ ဂုဏ်ထူးဖြင့် အောင်မြင်သည့်အခါ ဂုဏ်ပြုဆုငွေချီးမြှင့်ခြင်းတို့ကို နှစ်စဉ်ချီးမြှင့်ပေးလျက်ရှိပါကြောင်း၊

    ယခုဂုဏ်ပြုပွဲအခမ်းအနားတွင်လည်း သားငယ်/ သမီးငယ်များကို မှာကြားလိုသည်မှာ ပညာရှိမှ မှန်မှန်ကန်ကန် ဝေဖန် ဆုံးဖြတ်နိုင်ပြီး မှန်ကန်သည့် ဦးဆောင်မှုပေးနိုင်မည်ဖြစ်ပြီး ပညာရဲရင့် ပွဲလယ်တင့်ဆိုသည့်အတိုင်း ထူးချွန်ထက်မြက်သော ပညာရှင် များ ဖြစ်အောင် ယခုရရှိထားသည့် ထူးချွန်မှု အောင်မြင်မှုများနှင့် ကျေနပ်မနေသင့်ဘဲ ဆထက်ထမ်းပိုး ကြိုးစားသွားကြရန် ပြောကြားခဲ့သည်။

  ထို့နောက် ပြည်ထောင်စုဝန်ကြီးက ပညာသင်ထောက်ပံ့ကြေးများအား အမြဲတမ်းအတွင်းဝန်နှင့် ဦးစီးဌာနများမှ ညွှန်ကြားရေးမှူးချုပ်များထံသို့ အသီးသီးပေးအပ်ခဲ့ပြီး ပြည်ထောင်စုဝန်ကြီးမှ ဘာသာစုံဂုဏ်ထူးဖြင့် အောင်မြင်သူတစ်ဦးအား (၁၆) ပဲရည် ရွှေ(၁) ကျပ်သား ဆွဲပြားအားလည်းကောင်း၊ ဒုတိယဝန်ကြီးမှ ငါးဘာသာဂုဏ်ထူးဖြင့် အောင်မြင်သူတစ်ဦးအား (၁၆) ပဲရည် ရွှေ(၃)မတ်သား ရွှေဆွဲပြားအားလည်းကောင်း ပေးအပ်ချီးမြှင့်ခဲ့သည်။

    ဆက်လက်၍ အမြဲတမ်းအတွင်းဝန်၊ ညွှန်ကြားရေးမှူးချုပ်များက ဂုဏ်ထူးဖြင့်အောင်မြင်သူများကို တစ်ဘာသာလျှင် (၁) သိန်း ကျပ်နှုန်းဖြင့်လည်းကောင်း၊ သင်တန်းများတွင် ထူးချွန်ဆုရခဲ့သည့် ဝန်ထမ်းများအား ဆုများအသီးသီးချီးမြှင့်ပြီး ဆုရရှိသူ ကျောင်းသူ တစ်ဦးက ကျေးဇူးတင်စကားပြောကြားပြီး အခမ်းအနားကို ရုပ်သိမ်းလိုက်သည်။ ယနေ့ပညာရည်ထူးချွန်ဆု ချီးမြှင့်ခြင်း အခမ်းအနားတွင် ကျပ်နှစ်ရာသုံးဆယ့်တစ်သိန်းကိုးသောင်းအား ပေးအပ်ချီးမြှင့်ခဲ့ကြောင်း သတင်းရရှိသည်။